M2010.06.12

Sin thuas m'iarracht an teagasc seo don GIMP a leanúint.

M2010.06.11

"Do shláinte a Sheáin", is d'ól an bheirt a shláinte. Ar feadh an lae, agus iad ar deargmheisce ina dhiaidh. Chomh mór sin ar meisce go ndearna Seán cac fliuch ina bhríste! Siopa, bríste nua géine agus isteach sa traein. Leithreas le brístí a athrú. Ní bríste a cheannaigh Seán, ach seaicéad deinim!

Sin thuas m'iarracht litríocht leabhrán lasán a scríobh.

M2010.06.10

Caithfear a bheith ag gáire faoin bpraiseach a rinne "reibiliúnacha" Fhine Gael den dhúshlán ceannaire s'acusan.

M2010.06.09

"Ar a laghad ag teacht as an doirteadh ola seo beidh tuiscint níos fearr ar dhaoine nach féidir linn leanúint ar aghaidh ag sú gach acmhainn dheireanach as gach cúinne iargúlta ar domhan"

Sin thuas mo fhocail fhéin ar an sórt cacamais a chloisim ó bhealaí ón dá thaobh den Atlantach i leith tubaiste dhomhanda ola BP sa mhurascaill. Tá an tuairim bunaithe ar an dóchas gurb as an bpraiseach gan réiteach sin a thiocfaidh tuiscint agus éirím aigne agus feasacht chomhshaoil agus feasacht dhomhanda agus meas timpeallachta etc. Na rudaí maithe sin a ba chóir a bheith againn cheana. Na rudaí ba chóir a bheith mar bhunthuiscint d'aon shibhialtacht a bhfuil féinfheasacht dá ról ar an domhan le hacmhainní finideacha.

D'fhéadfaí na céadta milliún sampla a luaigh chun é sin a bhréagnú. Samplaí ó gach uile chúinne an domhain .i. lománaíocht na bhforaoisí báistí ón Astráil go dtí an Bhrasaíl, nó scriosadh leanúnach dumhcha ar chósta na hÉireann le haghaidh galfchúrsa (Féach thíos) go dtí an rud ceannann céanna ag tarlú thall i Vítneam.

Síor -scriosadh -ídiú -loscadh -tochailt -líonadh -leagadh -draenáil -spraeáil -druileáil ar thóir an t-aon ní a choinníonn an seó millteanach barbarach ag leanúint ar aghaidh, brabús.

Ós rud é go bhfuil an truailliú is nuaí seo i mbéal phobal na Stát Aontaithe is fiú sampla ón tír seo a luaigh mar shampla a thaispeántar nach bhfoghlaimítear aon ní as aon tubaiste -bíodh sin tubaiste thimpeallachta nó eacnamaíochta- nó scriosadh.

I bhfad sular rugadh mise thosaigh an cleachtas uafásach ina mbaintear barra sléibhte!
Is é sin le rá go scriostar sléibhte ina iomláine chun gual a fháil astu, agus leantar ar aghaidh leis an gcleachtas inniu gan gíog nó míog as an móraimh.
Ní dhéantar mianadóireacht a thuilleadh mar tá costas ag baint le pá oibrithe atá ag teastáil chun mianadóireacht a dhéanamh. Mar sin scriostar sliabh agus na gleannta atá ina thimpeall, baintear an gual atá ann, agus déantar brabús breá as an ollscrios.
Seo an gnáth-chleachtas gránna i measc caipitlithe atá ag baint guail óna Sléibhte Apaláiseacha. Tá níos mó na 500 sléibhte scriosta acu faoin am seo, níl aon rud foghlamtha ag an bpobal, agus beidh siad ag leanúint ar aghaidh ag leagadh sléibhte chomh fada agus atá brabús le baint as.
Sa chaoi chéanna leis an doirteadh ola is nuaí leanfar ar aghaidh leis an truailliú agus an bhrabúsaíocht as scrios na timpeallachta. Ní thiocfaidh meas timpeallachta sa chóras caipitlíoch, mar níl brabús le saothrú as meas timpeallachta.

Níos mó eolais maidir leis an ainghníomh anseo.
Íomhánna ó NASA ó 1984 ar aghaidh anseo.
Agus má tá Goolge Domhan agat tá nasc is féidir a íoslódáil anseo
Blagmhír faoi alt a bhí i Science ina leith le déanaí anseo

M2010.06.08

Chun leanúint ar aghaidh faoi cad is litríocht ann, nó a bheith níos cruinne cad is dea-litríocht nó droch-litríocht ann, táim chun úsáid a bhaint as an ghléas simplí a mhol Titley .i. mo thuairim féin faoi cad a thaitníonn liom agus nach dtaitníonn.

Táim díreach tar éis An Cléireach le Darach Ó Scolaí a athléamh. Agus táim ag léamh leabhar nua anois darbh ainm Ar Muir agus ar Tír le Michael Mullen (gan a bheith á mheascadh suas le Ar Muir is ar Sliabh le Somers).
Níl aon leid ar chúl nó ar thosaigh an leabhair seo a thugann le fios dom gur leabhar do pháistí, nó fhoghlaimeoirí atá ann. Mar sin glacaim leis mar leabhar do chách .i. léitheoirí atá in ann léamh.
Tá clúdach dáiríre air, in easnamh míniú nó focail níos fearr. Tá na dathanna beagnach mar an gcéanna ag clúdach Ar Muir agus ar Tír is atá ag clúdach An Cléireach.
Scéalta ficsin atá iontu araon freisin, ach ficsean bunaithe ar eachtraí stairiúla a tharla.
Stopann na cosúlachtaí ansin.

Anois chun úsáid a bhaint as mo mhéar, seo chugaibh dea-litríocht ó chéad pharagraf An Cléireach:

Ar chreig crochta os cionn na caschoille a chruinníomar buíon bheag oifigeach is giollaí, hataí leathna fáiscthe anuas ar chloigne cromtha, cruach is leathar ag lonrú faoin ngealach, agus sinn ag labhairt de ghlórtha íslithe. Thoir i mbéal an ghleanna mar a rabhadar an tríú complacht i ngleic fós leis an namhaid bhí an torann lámhaigh imithe i léig, agus ó am go chéile chualamar glórtha sa dorchadas agus fir mná is easláin á dtreorú trí an mbogach fearnóige is sailí cois abhann, nó ag dreapadh aníos faoin gcoillearnach coill is caorthainn chun iad féin a shíneadh amach go traochta ar an maolán glas raithní thíos fúinn.

Agus seo chugaibh an saghas litríochta eile ó chéad pharagraf Ar Muir agus Ar Tír!:

Bhí an caisleán Normannach ar thaobh na habhann. Bhí lúb san abhainn, agus tógadh ansin é fadó. Thaobh thall den abhainn bhí na coillte, agus ag síneadh amach laistiar den chaisleán bhí machaire mín agus na ba ag innilt ann. Ar Néifinn bhí rian an tsneachta fós, agus ar maidin bhí sioc liath ar an talamh. I measc na gcoillte, bhí na plúiríní sneachta ag fás. Bhí an geimhreadh thart. Bhí na huain go meidhreach sna páirceanna, agus bhí an féar ag fás arís.

An gcailltear caighdeán litríochta nuair a scríobhtar rud éigin i mbeagán focal?

M2010.06.07

Siúlóid bhreá fhada a bhí againn timpeall lúb Shliabh Feá. Tiománaí nach n-ólann inár dteannta, agus fonn pionta ormsa i ndiaidh na cnocadóireachta ar lá brothallach grianmhar. Isteach linn chun Cairlinn i ndiaidh na lúibe.
Blúiríní bia, pionta deas lasmuigh sa ghairdín beorach, scíth a ligean.
Sasana in aghaidh SAM ag tosnú ar an bhosca amadáin laistigh. Spéis ag cách an sean-namhaid a fheiceáil ag imirt in aghaidh a sean-namhaid. Isteach le cách, aosta is óg, fir is mná, cóisirí na stumpaí agus na mbáb.
N'fheadar cad é faoin sacar ar an bhosca amadáin ach ní féidir liom breathnú air, ró-leadránach is ea sacar le breathnú i mo thuairim. Is breá liom á imirt, ach ní á bhreathnú.

Agus fiú mura raibh sé lán 90 nóiméad de leadrán tá gné ar leith faoi chluichí sa Chorn Domhanda seo a chuirfeadh fonn éalú ar an leanúnaí is díograisí ar domhan, is é sin an bheach ollmhór atá ar foluain os cionn na páirce!
Beach a chuirtear "Vuvuzela" uirthi.
Séidtear an uirlis uafáis seo gan stad gan staonadh ar feadh 90 nóiméad leadránach!
Rachadh máistir Zen agus a mheabhair ag éisteacht leis an gcallán seo ar feadh 90 nóiméad. Ní bheidh mise ag déanamh amhlaidh i mbliana.


Murab ionann agus cluichí sacair ar an teilifís mholfainn siúlóid Shliabh Feá
(An Donn Cuailgne a shantaíonn Méabh atá sa sliabh seo, mar a thuairimíonn Somers ar a chlár!).
Tá sé éasca go leor mar dreapadh ach fós tá roinnt de na radhairc is fearr ó aon sliabhraon in Éirinn ar fáil uaibh.
Mar gheall ar cé chomh héasca is atá sé, agus caighdeán na radharc atá le feiceáil uaibh, bíonn an tsiúlóid seo an-ghnóthach le linn deireadh seachtaine grianmhar. Nílim cinnte cé acu is gnóthaí Cnoc na Riabh i gcontae Shligigh nó an ceann seo i gcontae Lú?
Agus i ngeall ar cé chomh gnóthach is atá sé tá do bhealach ó thús go deireadh leagtha amach duit ag an gcomhairle contae. Mar sin ní bhraitear ar feadh soicind amháin go bhfuiltear ag siúl ar shliabh iargúlta. Tá comharthaí treo ar fud na háite, greamaithe go deo ar charraigeacha móra anseo is ansiúd.
Rud, dar liom, nach gcuireann le sult na siúlóide ar chor ar bith.
Deirtear gur cuireadh ann iad toisc go raibh chomh mór daoine ag dul amú ar bharr na sléibhte. Ag cnocadóireacht gan léarscáil nó compás nó fios a mbealaí acu!

M2010.06.06

Iontas, agus béal lán oscailte orm ar maidin, agus ansin níos mó iontais le feiceáil go bhfuil Páirtí an Lucht Oibre an páirtí is mó sa tír dar leis an bpobalbhreith is nuaí san IT. Don chéad uair i stair na Poblachta -a thosaigh mar Phoblacht Shóisialach agus a d'fhás as fís shóisialach- tá páirtí sóisialach chun cinn ar na magairlí gréisceacha den sac buirgéiseach céanna .i. Fine Fail agus Fianna Gall.

Gáire séimh dom féin i ndiaidh a léamh. Níl splanc réabhlóideach na nGael múchta go fóill!
Ar ndóigh níl ann ach pobalbhreith agus is féidir athruithe móra a tharlú idir seo agus lá olltoghcháin, ach nach méanar dúinn an tseafóid a bheas le cloisteáil agus le léamh ó lucht Sindo agus raidió an deireadh seachtaine seo.
Táim chun nós daingean buan do mo chuid a bhriseadh agus an Sindo a cheannach díreach chun snámh i mbuairt agus eagla lucht gaimbín na tíre.
Ó nach bhfuil an schadenfreude binn borb blasta!

Go teoiriciúil, bunaithe ar na huimhreacha seo, d'fhéadfadh rialtas a bheith againn déanta suas de Pháirtí an Lucht Oibre, Sinn Féin, an Páirtí Sóisialach agus Páirtí na nOibrithe.....
Déan dearmad iomlán ar athrú Obama, bheadh athrú mar sin níos stairiúla fós...bíodh is go bhfuil sé beagán anabaí a bheith ag brionglóid mar sin anois.

Is spéisiúil an t-am seo inár stair.
Ach ní shin an chéad uair a chuir gluaiseacht shóisialach eagla ar an bhunaíocht in Éirinn, féach M2010.04.12 le haghaidh nasc chuig cláracha iontacha "Sóivéadaí na hÉireann"

M2010.06.05

Chaitheas agus mo chailín deireadh seachtaine fada (beagnach seachtain) grianmhar thíos i gCorca Dhuibhne le radharc breá againn ar Shléibhte Uíbh Ráthach, Sliabh Thír Ó mBaoill, Cnoc na dTobar, an Bhinn Mhór agus Cnoc Droinge etc.
Cnocadóireacht, snámh, iascaireacht, Gaeilgeoireacht, ól, éisteacht ceoil, grá agus léamh mar chúraimí againn.
Saol an mhilliúnaí a bhí ann, gan an t-airgead!
Nuair a bhíonn an ghrian ag taitneamh in Éirinn ní chreidim go bhfuil a diongbháil de thír le fáil.
I gcarbhán gan chumhacht a chónaímid ann, an chaoi is fearr laethanta saoire a chaitheamh i mo thuairim.
Ní éalú go dtí bothán gan chumhacht!
De bharr sin tá sé tábhachtach go mbíonn leabhar maith agat óir ní bheidh tú ag breathnú ar "Tá tallann ag an mBreatain" nó a leithéidí ar bhosca amadáin ar bith.
Bhí an t-ádh liom mar sin gur rug mé cnuasach aistí Alan Titley liom, "Chun Doirne".

Smaoineamh iontach a bhí ann roinnt de na haistí léirmheastóireachta is fearr dá chuid a chur le chéile mar seo. Óir is saothair den chéad scoth gach ceann de na 8 n-aiste sin, agus ba mhór an trua dá ligfí i ndearmad iad tar éis an méid sin dua a chaith an t-údar á scríobh.
Bhain mé an-sult as aistí fada léirmheastóireachta is tuairimíochta an Titlaigh, an-ábhar machnaimh atá iontu.

Spreag siad mé a bheith ag smaoineamh faoi litríocht na Gaeilge. Bhraith mé i ndiaidh a léamh gur mhaith liom cur le litríocht na nGael. Agus i ndiaidh a chéad aiste "An Cogadh in Aghaidh na Critice" a léamh thuig mé gan cheist dá scríobhfainn leabhar éigin ag am éigin amach anseo nach mbeidh mé ag foghlaim conas scríobh a dhéanamh trí theoiric liteartha éigin nó mhodh ar leith chun feabhas a chur ar mo scríbhneoireacht.
Ar shamhlaíocht m'intinne féin amháin a bheas sé bunaithe.
Ach n'fheadar mé an aontaíonn an Titleach leis féin faoin aiste seo inniu? Aiste a scríobh sé 15 bliain ó shin! D'fhéadfadh sé aiste a scríobh inniu ag moladh a mhalairt, ag moladh teoiricí liteartha, ach tuairimím nach ndéanfadh. Tá a chonair féin ag an bhfear san.

Nuair a smaoinítear faoi litríocht caithfear an cheist a chur; An litríocht blagadóireacht? Agus más litríocht é, cén saghas? Má tá saghas i gceist!
Agus an bhfuil sé ina droch-litríocht nó dea-litríocht den chuid is mó?
Bunaithe ar cad a thuigtear a bheith i litríocht agus cad a thuigtear a bheith i ndea-litríocht dar le lucht léirmheastóireachta.

Focal scoir leis an Titleach:

"Is é an gléas is fearr atá agat nuair a theastaíonn uait a mhíniú cad is litríocht ann, nó cad is dea-litríocht ann, ná do mhéar. Nuair a iarrtar ort cad is critic ann, nó cad is dán, nó cad is ardscríbhneoireacht ann síneann tú do mhéar amach i dtreo samplaí díobh, agus deireann tú, 'Sin critic!, nó "Sin ardscríbhneoireacht!'. Tugann tú cuntas ar do chuid tuairimí, ar do chuid imprisean, sin uile. Níl aon rud eile ann."

M2010.06.04

Tá go leor ráite maidir leis an 'mhíthapa' ach seo an ceann is fearr, dar liomsa!

M2010.06.03

"Chonaic mé cheana thú", mar a dúirt an cat leis an mbainne te.
"Chonaic mé cheana thú", mar a dúirt an cáiníocóir leis an bpoll bréan.
"Chonaic mé cheana thú", mar a dúirt an tÉireannach leis an mbád bán.
"Chonaic mé cheana thú", mar a dúirt an vótálaí leis an gcarn aoiligh.

Is beag iontais a bheadh ar an Éireannach in Guatamala na laethanta seo!

Maidir le poill slogaide na hÉireann tá Mac Uilliam cruinn mar is gnách leis, agus is dual dó. Faraor don tír seo bheadh sé níos fearr as ag labhairt go díreach leis an bhalla faoin am seo.

M2010.06.02

Bhí sé d'ádh orm Mícheál D. Ó hUiginn a chloisteáil beo sa Dáil inniu faoi cheist an chabhlacháin dhaonnúil le haghaidh muintir Gaza.
Sheas an ghruaig ar chúl mo chinn suas de bharr a phaisin agus a thuisceana leathan féin ar an cheist seo. Paisean agus tuiscint a tháinig as a thaithí pearsanta i nGaza.

Buíochas le duine i bPáirtí an Lucht Oibre tá a óráid ar You Tube anois, cúpla uair i ndiaidh a ráite.

B'aisteach a bheith ag éisteacht leis na hóráidí sa Dáil inniu, agus a bheith ag aontú le gach páirtí ann! Idir chlé, lár agus dheis ó thaobh idé-eolaíochta de bhí comhaontú iomlán ann; níl caint amháin maith go leor a thuilleadh i leith Iosrael agus a iompar leanúnach mídhleathach.

Mholfainn óráid Uí Uiginn ina iomláine go mór.



Cuirfidh mé na hóráidí eile suas de réir mar a fhaighim iad.

M2010.06.01

(Is breá liom Gimp!)

Ar eagla gur chaill tú an nuacht inné faoi Anglo; tá sé i gceist ag an rialtas €2 billiún sa bhreis a chaitheamh amú air.
Ní foláir dom a admháil go bhfuil mearbhall orm faoin méid airgid atá á chaitheamh amú againn ar bhancanna marbh na hÉireann anois!

Caithfear a bheith amhrasach freisin faoi tomhas ama na nuachta nua seo...
Is dóigh gur lá maith do dhroch-nuacht ciúin a bhí ann inné!

Is fiú cuimhneamh i gcónaí go bhfuil na billiúin seo dár gcuid airgid, is airgead ár gclainne le teacht, á gcaitheamh ar na bainc ag an am ceannann céanna is atá an rialtas ag cur ciorruithe troma ar na daoine is boichte i sochaí na tíre. An tseachtain seo féin deir Éamó go mbeidh sé ag cur deireadh go míthrócaireach le híocaíocht teaghlach aontuismitheora do pháistí níos sine ná 13.
Gearú siar is ea an ceann seo a chinnteodh go gcuirfidh daoine níos doimhne i mbochtaineacht, agus beartas nach sábhálfaidh an státchiste ach €30 milliún!